三個高強度消脂運動

今天會同大家介紹 3 個高強度而且高難度嘅消脂運動，分別會有跳繩 Double Under，跳箱 Jump Box，壺鈴前擺 Kettlebell Swing，呢 3 個動作難度同強度都好高，只係想分享一下，唔一定要跟住做。呢幾個動作需要用到唔同嘅肌肉，最重要嘅目的都係燃燒脂肪。

第一個動作 Double Under，呢個動作係由跳繩演變出嚟嘅，普通嘅跳繩動作係手跳一圈腳跳一下，但 Double Under 係當跳起時手會轉兩個圈，唔好睇小簡單嘅一下，多咗一下能夠將強度提升5倍，甚至技術好嘅話，可以 1 分鐘就將心跳率提升到最高水平，因人而異，係一個十分令人氣喘嘅動作。跳 Double Under 會用到鋼索製造嘅繩，不得不提，被呢啲繩鞭到嘅話會有疤痕，十分痛。

第二個動作係 Jump Box 跳箱，你可以睇到呢個箱係由65cm以及40cm組合而成，加起嚟接近 1 米，呢個動作要求爆炸力，運用到你嘅腳部及整個下肢嘅肌肉，臀部大腿後方，大腿前方都會運用到，呢啲部位都要經過鍛鍊先做到呢個動作，初學者可以先由矮嘅開始練習，如果本身冇做開運動就建議選擇其他動作，因為呢個動作都有啲危險性。影片中嘅示範動作係用布制跳箱，平衡性較差，容易跌倒，但唔會好堅硬。

第三個動作係 Kettlebell Swing 壺鈴前擺動作，呢個動作主要用到大腿後方及臀部，呢啲部位平時使用得比較少，適合一啲經常坐辦公室嘅人，我哋做嘅時候要運用到爆炸力，用盆骨位置推出時收緊臀部，做嘅時候腰部一定要挺直，膝蓋唔好推前，推出去嘅時候要呼氣。Kettlebell 一般喺大小型嘅健身中心都有，但一般人好少會買返屋企，因為都比較難舉，如果有去健身中心嘅人都可以試下做呢個動作。

平時熱愛運動嘅你，可以試下挑戰呢幾個動作，當你做到嘅時候，除咗減脂，你嘅成功感都會好大。